Autor: Karin Uttenthaler

Miscanthus hecksln

Veröffentlicht am | von Karin Uttenthaler

Servus i bin´s da Freddy ????

gestern warn´s wieder echt fleißig in Schusteröd.
Zam´mid de Nochbarn is ganz schee wos ganga…
Do ham´s nämle des Miscanthus g´hecksld
a staubige Sach´war des, des kann eich sogn!

Oba Zeit is´scho worn, weil´s nämle scho wieder frisch austreibt.
Mid dem nossn Weda vorher, ist immer nix gscheids gwen!
Gestern hod´s dann endlich hi´ghaud
do ham dann a boa Nochbarn zamghoiffa
und dann war´s a glei wieder vorbei.

Mia ham uns de ganze Gaudi von da weidn a´schaut
do war wos los, kann i eich sogn!

Des Miscanthus is echt wos guads!
I woas ned ob´s ihr des kennts?
Wochsn duads gegenüber vo unsra Woad.
Des ganze Joar kennan sich Reh, Hosn
und a manchmoi a, a boa Kinder drin verstecka ????
Wenn´s dann g´heckseld is, kann ma´s zum einstrah´, hoazn,
mulchen und nu fui andre Sachan hernemma.
Des scheene is, des kimmt jeds Joar wieder und ma kann
des 20 Joar lang ernten!

Heid geht´s glei wieder weida. ????
Da Andi hod glei in da Friah zum mahn a´gfanga
und heid auf Gschpaad wird dann nu ei´siliert.
Do werd´i mir glei wieder an guad Plotz sichern
damit i a ois gscheid seg.

I wünsch eich nu an scheena dog,
wenn´s megds schauts vorbei!

Bis boid eier Freddy ????

Zwillinge im Osternestl

Veröffentlicht am | von Karin Uttenthaler

Grias eich i bin´s, da Freddy ????

Ostern habts hoffentlich olle guad überstanden,
i hob a ganz bsondere Überraschung im Nest ghobt

Bei uns san ????????Zwilling worn!!! Mei, hob i mi gfreid!!!

Zwoa fesche buam, oana scheena wia da andre!
Ganz da Papa hoid ????

Da ???? Mama und de ???? Kids gehts guad,
ab Ende da Woch derfan´s dann a scho auf´d Woad ausse
oba erst wenn´s wieder a weng drockner is, sogd da Andi
ned dass earna so geht wia mia …

i bin nämlich im Baatz ausgrutscht, wia´s grengt hod
(in Ausübung meiner Pflicht wohlgemerkt ???? )
war ned so cool, oba mei, kann bassiern
drum bin i iatz a weng haatschad, oba des wird scho wieder

Wos mi ned umbringt, mocht mi stärker!!!

Hobd´s mi eigentlich scho ghert?
I üb´ nämle fleißig mein Brunftschroa ????
und i find des herd se scho saumäßig cool a
Besser auf alle Fälle, wia da Gustl, unsa junger Giggl ????
der hod immer nu a Stimmlage, wia a verroste Giaskann´

Oba bis zum Summa wiad des a nu….
mochts es guad, i wünsch eich a guade Zeit!

Bis boid eier Freddy ????

Frühlingsgefühle

Veröffentlicht am | von Karin Uttenthaler

Grias eich, i bin´s wieda da Freddy ????

Endlich wird´s Frühling überoi! ????
Es is echt schee, wenn de gloan
wieda länger draußen spuin kinnan.
Da wern´s so richtig miad
und gebn wenigstens dann aufd Nochd boid a ruah.
I glaub ihr könnts mi do guad versteh´????

Blos mid der Zeitumstellung, do hob i so meine Probleme,
do kann i mi ned recht dra gwen.
Voroim in da Friah,
do kimmt da Andi in oller Hergottsfriah,
reibt des Liachd a im Stoi,
so dass er noch´m Rechtn schaun kann.
Des versteh i eh, oba grod dann,
wenn ma nu a bissal kuschln meng.

So a Stimmungskiller! Do kennt er echt koa Gnad.
A bissal a Privatsphäre, wad do scho moi ned verkehrt.

Auf d’Feierdog moane wird´s richtig schee,
genießts es mid eichre Liabn!
I werd des gleiche moacha.

Und beim nächsten moi, erzähl i eich dann
vielleicht vom Andi sein´ neier Lehrling…

Mochts es guad bis dahin!

Scheene feierdog bis boid eier Freddy ????

Schaut aus wia a Schof…

Veröffentlicht am | von Karin Uttenthaler

Grias eich, i bin´s wieder da Freddy! ????

dera Woch´war wieder Verkauf und echt fui los bei uns.
A boa von eich ham dann sogar extra bei mir nu vorbeigschaut,
mei hod mi des gfreid!
Ihr habts es bestimmt scho gmerkt,
bei uns is oane mehr am Hof!
Schaut aus wia a Schof,
quietschd wia a Schof,
wird so groß wia a Schof
is´oba koans – komisch!
Is a Hütehund sogns ??

sie war a scho bei mia in der Herd unterwegs
do war ma goa ned gschreckt
obwoi ma´s goa ned kennt ham
sie hod oba fast de gleiche Farb wia mia
do hama´s goa ned von unsere Kaibal wegkennt
G´hern duads an Juniorchef und hoasd Sunny
komischer Nam´oba echt a feschs Madl dad i sogn!
So, mia wünsch´ ma eich nu a scheens Wochnend
machts es guad bis demnächst

eier Freddy ????

Freddy „the bull“ als Glücksfee

Veröffentlicht am | von Karin Uttenthaler

Grias eich´i bin´s wieder da Freddy ????

iatz hob i lang scho nix mehr hörn lossn i woas,
oba i hob a weng an Stress ghobt
I bin iatz nämlich offiziell Papa!!!

A bua und dann a boa dog drauf a dirndl
und dann glei numoi oans! ????
I war ganz schee aufgregt, oba es is ois guad ganga, do bin i froh!
Obs iatz mid herndl san oder so wia i „oben ohne“ des stellt sie erst in a boa Monat raus.

I bin scho gscheid gspannt! Heid ham´s gmoand,
i derf ois Glücksfee fungiern,
i – ois Fee!!! wia schaut denn des aus??? hob i gsogd!

Na ham´s gmoand, es gibt ja a männlich Feen!
„the rock“ zum Beispiel. i wad hoid dann quasi „ the bull“
aja, hob i mia denkt,
Freddy „the bull“ is scho irgendwie cool, oder?

Dann moch i hoid do mid …
Weil nämlich olle Fotos von de Busse super schee san,
und oans scheena ois des andre,
ham´s gmoant, dass ma am bestn auslosen.
I finds guad und fair. Des Los hod entschieden.

Drum derf i heid recht herzlich Fam. Grill & Co …. zum Gewinn von dem Gutschein gratulieren!

Olle andern, de ned gwunga ham,
sads ned traurig! Es geht ja heier wieder weida!

Weil uns de Fotos so stork gfoin ham,
könnts a heier wieder, pro Buchung a buidl zu uns
fia de nächste Rundn vom Gewinnspiel schigga ????

Und i, i kümmert mi iatz wieda um mein Nachwuchs,
mochts es guad!

Bis boid eier Freddy („the bull“) ????

Hoibstarke auf Freigang

Veröffentlicht am | von Karin Uttenthaler

Grias eich i bin´s wieder moi, da Freddy ????

vergangane Woch´ wia da Andi oa moi ned do war,
ham´s zwoa vo meine Hoibstarkn
an da oberen Woad wieder moi mid Freigang probiert????

Ganga is des nur, weil se woanders
welche midn Zaun gspuid ham,
so dass da Drohd dann im Baaz drin glengn is
und nimma de voie Spannung drauf war.
I glaub ja fast des war Teamwork!

Do ham´s oba ned midn Mich´grechnet!
Des is a guada Nachbar vo uns und a Jaga.
Der is do grod recht kemma, war ja a bisserl gfährlich
weils auf da Hauptstroß rumglauffa san!
Der hod ned lang facklt und hod de Gauner wieda
in Woad eineghoiffa und gschaud, dass drin bleim.

Des is hoid a Nachbarschaftshilfe, sowos is echt fui wert!
Locha hama dann miasn, wia da Andi dann
an Zaun obsuacht hod, wo´s denn genau feid.
Er hods ja glei richtn miasn, dass des ned wieder bassiert.
Vo lautern pressiern und schneij schneij,
is er nämle midn Stiefe im Baz stegga blieb!
Dawei er se umgschaut hod,
is er scho midn Seggl im nossn dreck drin gstandn.
Karin hod gmoand, sie hod´n bis in Haus eine fluacha gherd.
Er streit ois ob! Geht ja a fast goa ned.

I woas vo nix!
Oba lustig wars. I hätt´ ja gern a Foto gmochd fia eich,
oba i hob ja koa handy ned. Wad vielleicht wos fia Weihnachtn,
des werd´i glei moi vorschlogn.

Oba i glaub a jeda vo eich woas wia des is,
weil´s eich selber scho moi bassiert is.
So iatz muas i wieder nochm recht´n schaun,
ihr herds von mir,

bis boid, eier Freddy ????